-
Inicio
-
Multimedia
- Novas LugoPatrimonio
Últimas Novas (551)
Últimas novas da asociación LugoPatrimonio
Se queres recorrer o decreto Feijoo contra o noso idioma, podes cubrilo aquí e envialo
Copia o seguinte texto, ou descárgao en formato word premendo AQUÍ, cúbreo e envíao a: Este enderezo de correo está a ser protexido dos robots de correo lixo. Precisa activar o JavaScript para velo.. Para facermos seguimento podes enviar copia a: Este enderezo de correo está a ser protexido dos robots de correo lixo. Precisa activar o JavaScript para velo. .
En relación coas Bases para a elaboración do decreto de plurilingüísmo presentado publicamente a noite do 30 de decembro de 2009, presenta as seguintes
ALEGACIÓNS
O borrador de decreto presentando na noite do 30 decembro:
1) Non garante que os estudantes finalicen cada etapa educativa coas destrezas lingüísticas tamén en galego.- Todos os informes oficiais sinalan que hai un problema para conseguir que boa parte dos rapaces e das rapazas, sobre todo nas zonas urbanas, teñan fluidez comunicativa en galego. Diminuír a presenza da nosa lingua non fará máis que agravar a situación, vulnerando o dereito do alumnado a unha educación de calidade e pondo en perigo a pervivencia da nosa cultura.
2) É unha proposta feita de costas á sociedade galega.- O presidente da Xunta sabe que non conta con ningún consenso do profesorado, o estudantado, as familias e da sociedade en xeral para este decretazo. Por iso o presentou na véspera de fin de ano, a última hora do serán, e sen que existise ningún proceso previo de diálogo nin contraste.
3) Suporá enfrontamentos nos centros.- A Xunta fai deixadez das súas funcións e traslada o problema ao profesorado, ao estudantado e ás familias, que serán parcialmente consultadas (ben tendo en conta só o criterio da maioría, sen que se saiba que pasará coa minoría que se sinta perdedora; ben dando unha opinión cada catro anos, o que significa que uns pais darán a súa consideración sobre a educación das fillas e dos fillos doutros). A política lingüística e educativa non se pode limitar á opinión que poida ter a comunidade escolar, porque nos corresponde a todas as galegas e a todos os galegos. Hai que ter presentes criterios pedagóxicos e o dereito a unha educación en igualdade.
4) É unha burla á cidadanía cando di que se vai impartir un terzo das materias en inglés, cando sabe que iso é totalmente inviábel, e sen se preocupar do fracaso escolar.- O presidente da Xunta mente conscientemente cando fala de “plurilingüismo”, pois sabe que iso é imposíbel de aplicar. Só utiliza o inglés para camuflar propagandisticamente o ataque contra o galego. Na verdade, os departamento de inglés non teñen un reforzo real para mellorar a aprendizaxe desta lingua e mesmo se recortan os recursos para a formación do profesorado e se reduce o número de profesores/as das escolas oficiais de idiomas. O reforzo e mellora do ensino de inglés no sistema educativo galego debe facerse con máis profesorado específico, con máis recursos e con grupos máis reducidos
5) Vulnera leis básicas aprobadas por consenso e tratados internacionais de dereitos lingüísticos.- O decreto que o Goberno galego quere impor unilateralmente vulnera a letra e o espírito da Lei de normalización lingüística (arts. 12 e 13), así como da Carta europea de linguas rexionais ou minoritarias (art. 8). Un goberno serio, cívico e responsábel cumpre as leis e os tratados internacionais de dereitos humanos e de dereitos lingüísticos.
6) Porque é unha agresión á dignidade da nosa cultura que haxa un goberno da Xunta que ande ás patadas coa lingua propia do noso país.- Temos que erguer a nosa voz con claridade e exclamar que, independentemente do idioma que falemos no noso día a día, os galegos e as galegas amamos a nosa lingua propia e queremos que non haxa políticas para discriminala, senón ao contrario: que se promova nos diferentes ámbitos, garantindo a igualdade de dereitos.
Fronte á imposición unilateral de Alberto Núñez Feijóo, reclamo que se escoite a voz das comunidades educativas. O presidente da Xunta debería lembrar que o decreto aínda en vigor contou co respaldo dos sindicatos que representan ao 90% do profesorado, a inmensa maioría das ANPAs, todas as organizacións estudantís e todos os movementos de renovación pedagóxica con actuación en Galiza. O seu decreto contra o galego, ao contrario, non xera máis que rexeitamento e preocupación.
Por todo isto
SOLICITA
A aplicación real e efectiva do decreto 124/2007 e do Plan Xeral de Normalización Lingüística aprobado por consenso e unanimidade polo Parlamento Galego.
Asdo:
Don/ Dona
En ……………………….a.. de xaneiro de 2010
AS FOTOS DA VIAXE Á CIDADE DA CORUÑA
Fermosa e atractiva cidade, mesmo nos grises do frío, e máis aínda se a vemos, como así pasou, con ese guía de fantasía que é Felipe-Senén López , o coñecedor máis profundo da xeografía do noso país, e do que tiñan que aprender bastante todos os nosos embaixadores, sobre todo os romanos. A cidade presentóusenos, pois, nos grises da beleza, no encanto das súas xentes e nese inmenso e nunca superado monumento formado pola Cidade Vella. Pero tamén topamos coa cidade dos desclasados gobernantes, esa cidade que comeza con aquela doma e castra dos chamados reis Católicos, cando crean a Real Audiencia, e cando se van montando posteriormente eses organismos militares que chegan a mudar, mesmo, os nomes propios e populares, a topografía e a configuración urbanística. Nótase isto no paseo, e chama a atención a ausencia do idioma propio, do galego, como se houbese unha programación para que A Coruña non se sinta galega e esqueza os seus símbolos e a súa historia. A política do cemento estoupa sobre os sufridos rochedos esmagados, e esas obras millonarias feitas tan só para que os nomes dos que se cren deuses perduren, sexan edificios, mobiliario urbano (a afronta violentísima deses farois enormes que chocan cos ollos) ou símbolos alleos á cultura de raíz. Así que o paseo foi instrutivo ao respecto, e as fotos que poñemos aquí mostran a variedade de formas e de programacións, de ideas, de prexuízos e fachendas. E, sobre todo, que A Coruña, a pesar dos poderosos destrutores, estoupa máis fermosa cando mostra as raíces creadas pola súa historia.
 |
| 20100116_A_Corunha |
Felipe-Senén López falou ante un amplo auditorio da historia e lendas da Coruña
Aspectos orixinais e diferentes dos habituais que se din da Coruña, a cruña, o corno, a coroa... como a definiu o eminente conferenciante e investigador da nosa historia e orixes, Felipe-Senén. Cativou a xente que acudiu durante máis dunha hora coas historias, lendas e investigacións propias sobre unha cidade que aínda hoxe, despois de polémicas incomprensíbeis, segue sen ser coñecida polos seus gobernantes, de aí a manipulación con que xogan para proveito exclusivo e persoal. Proba disto é o esquezo e desinterese en que se mantén o caso antigo, o corazón, logo, da Coruña. O próximo sábado veremos con Felipe-Senén, a pé, como é de rigor nos viaxeiros, as pedras e os contos, o positivo e negativo que mantén con gloria ou desacerto esta fermosísima cidade galega.
Felipe-Senén López falou ante un amplo auditorio da historia e lendas da Coruña
Obradoiro de animación á lectura.
Estamos a preparar, seguindo a petición dalgúns asociados e asociadas, un Obradoiro de animación á lectura, que ten como fundamento familiarizarnos coa lectura e escrita do noso idioma, o galego. En principio, serán xornadas de dous días á semana (luns e martes), con hora e media cada un (entre 20 e 21,30 h.) e até contemplar o cómputo de 35 ou 40 h. en total.
Tratarase de facilitar simplemente a lectura, escritura e coñecemento da nosa lingua, sen complicacións gramaticais; simplemente para ter o convencemento de que sabemos ler e escribir en galego, e tratar de ampliar os nosos coñecementos nesta grande obra que construíron con amor e cariño os nosos antepasados.
En principio tamén, pensamos en realizar este proxecto en colaboración coa Vicepresidencia 2ª Área de Cultura da Deputación Provincial, así que necesitamos saber xa o número de asociados e asociadas, ou mesmo que non o sexan, (dependerá das prazas a cubrir) interesados nesta actividade.
A partir de hoxe, podedes chamar ao tfne. 676 800 227, ou mesmo escribir ao noso correo para saber o voso parecer e anotarvos (Este enderezo de correo está a ser protexido dos robots de correo lixo. Precisa activar o JavaScript para velo.). Tamén podedes deixar os vosos comentarios no foro previsto na páxina web; para facelo, despois de premer no enlace, premendo no botón Novo Tema, poderedes deixar o voso comentario.
Iniciaríamos esta actividade no mes de marzo.
Quedamos á vosa disposición para recoller o voso parecer.
Actividades de LugoPatrimonio para mañá, martes, 12 de xaneiro 2010
Mañá, 12 de xaneiro do 2010, ás 20 h. e no salón de actos da Deputación provincial de Lugo, o arqueólogo, escritor e grande animador cultural, Felipe-Senén López, expoñerá mediante proxeccións e comentarios a conferencia: A Coruña desde unha visión orixinal e diferente: arqueoloxía e lenda.
Esta conferencia é parte inicial da viaxe que LugoPatrimonio proxecta a esta cidade da Coruña, para o próximo sábado, 16 de xaneiro, que será guiada tamén por este guía de excepción que é Felipe-Senén López .
As persoas que queiran participar na viaxe poderán anotarse o mesmo día da conferencia (12 de xaneiro), entre 18,30 h. e 20 h. e no mesmo lugar (salón de actos da Deputación Provincial de Lugo).
Lugo, 11 xaneiro 2010
A Xunta Directiva
1 de febreiro 2010: Viaxe virtual e comentarios sobre Exipto
O próximo día 1 de febreiro, ás 20 h. e no salón de actos da Deputación Provincial de Lugo, o noso presidente, Lois Diéguez, e a representante da axencia coa que imos viaxar a Exipto, Nadia Abelleira, presentarán mediante proxeccións a viaxe virtual por este fermoso e máxico páis que é Exipto.
Despois das proxeccións daremos os últimos avisos a ter en conta para a viaxe por Exipto e atenderemos calquera suxestión que se presente.
Josep Sala, axudounos a viaxar polos itinerarios de Exipto
O representante da axencia de viaxes coa que viaxaremos a Exipto en febreiro, Josep Sala (Tarawa Travel), instruíunos o pasado día 18 de decembro, cunha interesante exposición sobre monumentos e paisaxes que durante a nosa estanza coñeceremos. Detallou, ademais, as condicións diversas que incidirán no goce máis axeitado. E foi sometido a un verdadeiro bombardeo de preguntas.
VIAXE A EXIPTO. PROGRAMA E CONDICIÓNS
ESPECIAL "MISTERIOS DO NUBIO"
12FEB. ESPAÑA - O CAIRO
Presentación no aeroporto para coller o voo con destino ao Cairo. Chegada, asistencia por parte do noso representante e trámites de visado. Traslado ao hotel e aloxamento.
13FEB. O CAIRO - LUXOR
Almorzo. Pola mañá, visita das pirámides de Xiza: Quéops, Quefrén e Micerinos (non inclúe a entrada ao interior), a Esfinxe con cabeza humana e corpo de león e o templo do Val de Quefrén. Xantar en restaurante local. Máis tarde, dirixirémonos cara a Memphis, a antiga capital do imperio, e Sakkara, onde está situada a pirámide Graduada de Zoser. Finalizada esta visita, viaxaremos cara ao aeroporto para coller o voo con destino a Luxor. Chegada, traslado ao hotel e aloxamento.
14FEB. LUXOR
Almorzo. Pola mañá, dirixirémonos cara a Dendera, a uns 70 quilómetros ao norte de Luxor. Dendera, foi capital do culto á deusa Hathor, raíña do amor, da alegría, da música, da danza e da embriaguez. O templo de Hathor conta con dúas salas hipóstilas e o "patio do ano novo" con capiteis hathóricos. Dentro do templo hai doce criptas decoradas, e dúas capitallas funerarias de Osiris, dunha delas procede o célebre "zodíaco" que se expón no Museo do Louvre, en París. No tellado había unha capela onde se celebraba o rito da unión da deusa Hathor co disco solar. Un gran muro de adobes rodea o recinto cunha porta monumental de Domiciano e Traxano. Ao finalizarmos esta visita, proseguiremos cara a Abydos, unha das cidades máis sagradas do país durante a época faraónica. Abydos foi capital do culto a Osiris, o deus dos mortos, quen, segundo conta a lenda, acabou por repousar neste lugar despois de ser asasinado polo seu irmán Seth. Veremos o templo de Sety I. Morada do deus Osiris, disque que neste lugar está enterrada a cabeza de Osiris. Deste templo chegáronse a escribir libros pero o que máis me asombrou foi a parede na que se atopa a famosa "táboa real de Abydos". Nela atopamos os nomes de 76 faraóns, unha lista que vai dende Menes (primeiro faraón) ata Sety I, aínda que deixa no esquecemento algún que outro, entre eles faraóns tan famosos como Tutankhamon, Smenkhare, o Padre Ay e a raíña Hatshepsut. Xusto ao seu lado, atopamos a Sety I acompañado dun novo príncipe, Ramses II. Regreso a Luxor, cea nun restaurante local, traslado ao hotel e aloxamento.
15FEB. LUXOR
Almorzo. Pola mañá, realizaremos a visita ao Val dos Reis, onde se edificou durante o Imperio Novo a necrópole real, o Val das Raíñas, a necrópole real das esposas dos faraóns e dos príncipes que non reinaron, principalmente das dinastías XIX e XX. O val recibiu o nome de "Praza das Belezas" e alberga 80 tumbas catalogadas, de desigual interese. Finalmente visitaremos o Val dos Nobres, no que se realizaron os enterramentos de máis de catrocentos nobres e altos dignitarios tebanos; tumbas que datan do período comprendido entre a VI dinastía e a época clásica. Situáronas nun outeiro con vistas ao Nilo e decoráronas con interesantes escenas da vida cotiá.
Posteriormente visitaremos tamén o templo de Hatshepsut, deseñado polo arquitecto favorito da raíña, Senmut, o responsable de lle dar a forma ao "sorriso da raíña", tal e como se coñece este fermoso monumento. Tamén veremos o templo funerario de Ramsés III, coñecido como Madinet Habu e os Colosos de Memnon.
Traslado ao barco, aloxamento e xantar a bordo do barco. Pola tarde, realizáremos a visita do museo de Luxor, no que se atopan moitos dos restos arqueolóxicos localizados nos templos de Luxor e Karnak e tamén asistiremos ao espectáculo de luz e son no templo de Karnak. Ao finalizarmos a visita, regreso ao barco, cea e aloxamento.
16FEB. LUXOR / ESNA
Almorzo. Visita aos templos de Luxor, o monumento máis emblemático da cidade e Karnak, considerado o máis grande do mundo. Xantar a bordo. Continuamos cara a Esna. Cruzaremos a esclusa de Esna (en caso de estar pechada, este percorrido realizarase en autocar) e seguiremos navegando cara a Edfu, cea e noite a bordo do barco.
17FEB. ESNA / EDFU / KOM OMBO
Pensión completa. Chegada a Edfu, visita do templo de Edfu dedicado ao deus Horus. Navegación cara a Kom Ombo, visita do templo de Kom Ombo, o único dedicado a dúas divindades: o deus Sobek con cabeza de crocodilo, e o deus Haroeris con cabeza de falcón. Navegamos cara a Aswan, cea e noite a bordo do barco.
18FEB. ASWAN
Almorzo. Pola mañá realizaremos a visita da gran presa de Aswan, unha das máis importantes do mundo e o obelisco inacabado. Xantar a bordo. Pola tarde, realizaremos un paseo en falucas, desde onde poderemos ver unha panorámica do mausoleo de Agha Khan, da illa Elefantina e do xardín botánico e remataremos coa visita a camelo até o poboado Nubio. Visita a illa de Philae. Regreso ao barco, cea e noite a bordo.
19FEB. ASWAN / ABU SIMBEL
Almorzo e desembarque. Saída por estrada cara a Abu Simbel e visita dos seus templos. Traslado ao cruceiro Nubio e xantar. Pola noite, asistiremos ao fantástico espectáculo de luz e son destes templos faraónicos. Cea e noite a bordo do barco.
20FEB. ABU SIMBEL - KASR IBRIM - AMADA - WADI AL-SEBOUA
Pensión completa. Poderemos gozar dende o barco dos restos do templo de Kasr Ibrim. Pola tarde, visitaremos o templo de Amada, construído por Tutmosis III e Amenofis II e dedicado aos deuses Amon Ra e Ra-Horajyt. Continuaremos a visita coa Tumba de Penut. Navegación cara a Wadi Al-Seboua e noite a bordo do barco.
21FEB. WADI AL-SEBOUA - DAKKA - ASWAN
Pensión completa. Visitaremos os templos de Wadi Al-Seboua, construído por Ramsés II, o templo de Dakka e o templo grecorromano de Moharraka. Navegación cara a Aswan e noite a bordo.
22FEB. ASWAN - O CAIRO
Almorzo e desembarque. Despois da visita de Kalabsha, trasladarémonos cara ao aeroporto de Aswan para voar cara ao Cairo. Xantar en restaurante local (en función do horario do voo, este xantar realizarase en Aswan ou no Cairo). Chegada, asistencia e visita da cidadela de Saladino coa mesquita de Mohamed Ali e o Museo de Antigüidades. Remataremos a visita, dando un paseo polo bazar Khan Al-Khalili. Traslado ao hotel e aloxamento.
23 FEBREIRO O CAIRO
Almorzo. Pola mañá sairemos para realizarmos as últimas visitas do Cairo, como a mesquita de Ahmed Ibn Tulun, o Sultán Hassan, Al-Azhar, Al-Rifai, e o Museo de Arte Islámica. Xantar en restaurante local. Continuaremos polo barrio Copto, e visitaremos a sinagoga Bez Ezra, a Igrexa Colgante, e a igrexa de San Sergio (non inclúe a visita ao Museo Copto). Regreso ao hotel e aloxamento. Pola noite, asistiremos ao espectáculo de luz e son das Pirámides, incluíndo a cea en restaurante local. Ao finalizar, regreso ao hotel e aloxamento.
24FEB. O CAIRO - ESPAÑA
Almorzo no hotel. Á hora prevista, traslado ao aeroporto para coller o voo de regreso a España. Chegada e fin dos nosos servizos.
NOTA: A orde do programa pode variar, mantendo sempre o seu contido.
HORARIOS DE VOOS (previstos):
12FEB MAD-CAI MS754 15.05-20.35
13 FEB CAI-LXR A reconfirmar
22 FEB ASW-CAI A reconfirmar
24FEB CAI-MAD MS753 09.45-14.05
* MOTONAVE SOLARIS II ou SIMILAR - HOTEL RAMSES HILTON
/ NOVOTEL O BORG ou SIMILAR (centro Cairo)
12-13 FEB: O CAIRO: H.RAMSES HILTON / NOVOTEL EL BORG ou SIMILAR
13-15 FEB: LUXOR: H.SONESTA SAINT GEORGE ou SIMILAR
15-19 FEB: CRUCEIRO NILO: MOTONAVE SOLARIS II ou SIMILAR
19-22 FEB: CRUCEIRO NASSER: NUBIAN SEXA ou SIMILAR
22-24 FEB: O CAIRO: H.RAMSES HILTON / NOVOTEL EL BORG ou SIMILAR
Os prezos inclúen:
*Billete de avión Madrid-O Cairo-Madrid en liña regular en clase turista.
*Voos internos O Cairo-Luxor/Aswan-O Cairo en liña regular
*Todos os traslados
*Guía de viaxe por habitación dobre.
*Guía en castelán durante todo o percorrido
*3 noites no Cairo en réxime de aloxamento e almorzo
*2 noites en Luxor en réxime de aloxamento e almorzo
*4 noites de cruceiro polo Nilo en réxime de pensión completa
*3 noites de cruceiro polo lago Nasser en réxime de pensión completa
*Además incluímos 3 xantares no Cairo (1 deles poderá realizarse en Aswan en lugar de no Cairo, en función do horario do voo)
*Tamén inclúe 1 cea na cidade do Cairo en restaurante (día de espectáculo de luz e son nas pirámides)
*Visitas incluídas:
NA CIDADE DO CAIRO:
-Templo do Val de Quefrén, pirámides de Quéops, Quefrén e Micerinos e Esfinxe
-Memphis e Sakkara
-Visita da cidadela de Saladino coa mesquita de Mohamed Ali, o museo de Antigüidades, o bazar Khan Al-Khalili.
-Visita da mesquita de Ahmed Ibn Tulun, Sultán Hassan, Al-Azhar, Al-Rifai, Museo de Arte Islámica e Barrio Copto (non inclúe visita Museo Copto)
-Espectáculo de Luz e Son nas Pirámides
EN LUXOR:
-Visita de Dendera e Abydos
-Visita do Museo de Luxor, templos de Luxor e Karnak.
-Espectáculo de Luz e Son no Templo de Karnak.
-Val dos Reis, Val das Raíñas e Nobres,Templo de Hatschepsut, Madinet Habu, Colosos de Memnon.
CRUCEIRO NILO:
-Templos de Edfu e Kom Ombo
-Presa de Aswan e Obelisco Inacabado
-Paseo en falucas
-Visita a Philae
-Poboado Nubio (entrada a camelo)
CRUCEIRO NASSER:
-Espectáculo de luz e son en Abu Simbel
-Templos de Kasr Ibrim, Amada
-Tumba de Penut
-Templo Wadi Al-Seboua, templo de Dakka, Moharraka e Kalabsha
*Visado
*Taxas aéreas
*Seguro básico de viaxe
Os prezos non inclúen:
*Bebidas
*Propinas
*A visita á Cidade dos Mortos
*Entrada ao interior da pirámide de Quéops
*Extras nos hoteis, como mini-bar, lavandaría, chamadas telefónicas, etc.
*Nada non especificado no apartado anterior
*PRECIO COTIZADO PARA GRUPO MÍNIMO DE 25 PERSOAS.
PREZO POR PERSOA EN DOBRE: 1.635 EUROS
Suplemento individual: 420 EUROS
AUTOCAR HERVEY - Traslado autocar.
Lugo- Aeroporto Madrid // Aeroporto Madrid - Lugo
Importe total é de 1800 Euros que se repartirá entre os viaxeiros e viaxeiras ( Capacidade 25/30 persoas ).
CONDICIÓNS DO SEGURO
- Na primeira folla indícase o seguro de básico incluído no prezo da viaxe.
- O seguro opcional ten dous importes diferentes. As cláusulas son as mesmas para ambos os dous prezos pero vai variar o seu prezo dependendo do importe que se queira cubrir da viaxe:
◦ 30 euros para cubrir cantidades até 1500 euros
◦ 50 euros para cubrir cantidades até 3000 euros
A asemblea anual de LugoPatrimonio aprobou as contas do ano e o proxecto de actividades para o 2010
Mostra a súa preocupación polo silencio que mantén a Xunta a respeito de varios proxectos iniciados nos dous últimos anos
Cunha participación importante de asociados e asociadas, a asemblea anual da nosa asociación, despois de dúas horas de traballo, aprobou diversos temas de interese para o futuro non só da propia asociación, senón da nosa cultura e patrimonio. Destacamos, entre eles, os seguintes:
- Agradecido recoñecemento ao traballo realizado pola directiva durante o ano 2009, destacando a xestión económica e a programación das actividades. Asimesmo, cun longo aplauso, agradeceuse o labor da secretaria, Tareixa Cabello, que por diversas razóns persoais deixa esta responsabilidade.
- Preocupación polo silencio que segue a manter a Delegada Territorial da Xunta a respeito de distintos proxectos relacionados coas Terras de Lemos e aprobados no Congreso sobre o Patrimonio Inmaterial, que se lle presentaron ao novo goberno autonómico pouco despois da toma de posesión. Moitos deses proxecto relacionados co futuro turístico, cultural e económico da comarca, que se comezaran a executar anteriormente, están neste momento paralizados. A Asemblea pídelle á Delegada Territorial que non adíe máis a data da entrevista solicitada con ela por parte das distintas asociacións de Lemos que traballan polo noso Patrimonio.
- Preocupación pola persecución que está a sufrir por parte da Xunta de Galicia, o maior patrimonio creado polo pobo galego: o seu idioma.
- Aprobación das actividades presentadas para desenvolver durante o ano 2010: viaxes e actos diversos relacionados cos mesmos, á Coruña, Vigo e Ferrol; Terras e xentes en Rosalía de Castro (viaxe de 2 días polas terras de Padrón); Terras do Bierzo seguindo a novela de Enrique Gil y Carrasco, “El señor de Bembibre”; Xornadas sobre a romanización, con viaxes e percorridos por Lugo, Bande, Valladolid e Palencia; O Courel de Novoneira para completar o coñecemento das terras nativas do poeta: Viaxe tamén seguindo os pasos da biografía de Inés de Castro con visitas a Coimbra, Alcobasa e outros lugares de Portugal; Ciclo do Ferro a desenvolver en diversos meses do ano (marzo, outubro e novembro), con visitas a Riotorto, Cervo, A Pontenova, Samos, Taramundi. Viaxe sorpresa a realizar en agosto.
- Interese cultural e social destacado pola primeira viaxe que a asociación programa para o estranxeiro afastado, Exipto, que se presentou detalladamente no seu desenvolvemento e do que se poden ver condicións e datas noutro apartado desta mesma páxina.
- Cursiño sobre Animación á Lectura co obxecto de perfeccionar o coñecemento oral e escrito do idioma galego.
- Agradecemento aos distintos organismos públicos que nos axudaron a desenvoler a nosa actividade durante os dous últimos anos: Consellaría de Medio Rural, Agader, Sociedade de Xestión do Xacobeo, Consellaría de Industria, Vicepresidencia 1ª da Deputación Provincial, Concellos de Monforte, Chantada, A Pobra do Brollón, Taboada e Quiroga.
- Condolencia pola morte de dous asociados moi queridos: Xesús Vilanova Vázquez e Cándido Rodríguez Caneiro.
Lugo, 12 decembro 2009
Máis...
Vente connosco a Exipto
Aínda que os datos non son definitivos, si podemos ofrecer unha avanzada nos mesmos.
- Andaremos por Exipto entre os días 12 e 24 de febreiro.
- O prezo, con case todo incluído, achegarase aos 1700 euros.
- O prazo para anotarse está fixado até o 22 de decembro. Se che interesa, sexas ou non asociado ou asociada de LugoPatrimonio, chama ao telefone 676 800 227.
- Deseguido ofrecémosche os lugares que visitaremos:
O CAIRO
- Pirámides de Gizeh e Esfinxe. Visita interior da de Keops.
- Menphis
- Saqqarah
- Espectáculo de luz e son nas Pirámides
- Cidadela. Mesquitas de Ahmed Ibn Tulun, sultán Hassan, El-Azhar, Al-Rifai e mesquita de Alabastro.
- Museo arqueolóxico.
- Museo de Arte Islámico.
- Barrio Copto
- Cidade dos mortos.
- Mercado el Khalili.
CRUCEIRO POLO LAGO NASSER
- Templo de Kalabsha
- Templo de Beit el Wali
- Quiosco de Kertasi
- Templo de Wadi El Sebua
- Templo de Daka el Maharraka
- Templo de Amada. Tumba de Pennut
- Kars Ibrim
- ABU SIMBEL (Templos de Ramsés II e Nefertari. Espectáculo de luz e son)
ASSUÁN
- Presa Alta
- Canteiras de granito e Obelisco inacabado.
- Paseo en falua pola Illa Elefantina. Paseo en camelo até a aldea nubia.
- Illa de Philae. Templo de Isis. Espectáculo de luz e son.
KOM OMBO
- Templo de Sobek e Haroeris.
EDFU
- Templo de Horus.
LUXOR
- Necrópole de Tebas
- Val dos Reis con visita a 5 ou 6 tumbas.
- Val das Raíñas con visita a 1 tumba.
- Templo de Hatshepsut.
- Val dos nobres con visita a 3 tumbas.
- Templo de Medinet Habu.
- Colosos de Menon.
- Templo de Karnak. Espectáculo de luz e son.
- Templo e museo de Luxor.
DENDERA
- Templo de Hathor.
ABYDOS
- Templo de Osiris.
- Templo de Ramsés II.
Actos de LugoPatrimonio para o mes de decembro 2009
Día 2, mércores: conferencia e proxeccións de Delfín Caseiro Nogueiras (escritor), sobre Viaxe de Inverno: Ourense interior, ás 20 h. no salón de actos da Deputación provincial.
Anotacións para a viaxe do día 19, no mesmo lugar, entre 19 e 20 h. Prazas limitadas a 50. Preferencia das asociadas-os sobre os que non o son.
Día 19, sábado: viaxe ao Ourense interior nestes días de inverno, para visitar os seguintes puntos: San Pedro de Rocas (mosteiro e Centro de Interpretación da vida monástica), Xunqueira de Espadañedo (mosteiro e igrexa románica), Montederramo, (mosteiro e igrexa), Santuario dos Milagres (igrexa), Xunqueira de Ambía (igrexa románica de Santa María a Real) e Ourense, onde a última hora da tarde faremos unha visita ao Belén de Arturo Baltar e teremos un encontro con el para falar da súa obra.Deseguido, tendo en conta que se cumpre o 50 aniversario da edición de A Esmorga, de Eduardo Blanco Amor, faremos un percorrido por dous ou tres puntos do roteiro da mesma sinalados nas rúas de Ourense próximas ao Belén.
Día 11, venres: asemblea ordinaria anual para ver como andamos de cartos e que imos facer durante o ano 2010.
Lugo, novembro 2009
Ás portas de Rinlo
Froito dun ano de laboriosidade, o fotógrafo Fernando Páez (Ribadeo, 1953) preséntanos “Ás portas de Rinlo”, a súa persoal visión das xentes e paisaxes deste lugar primixenio e antigo. O gusto do fotógrafo pola representación silenciosa do paso do tempo (“Incursións”, 2005) e o pulso para captar o inenarrable continúan vivos neste novo traballo. O artista retrata os veciños en actitude estoica ás portas das súas casas ou no límite do espazo transitado dos cantís, captando a súa ineludible e dura existencia diaria. As imaxes austeras, melancólicas e naturalistas son tanto unha homenaxe ás persoas e a natureza portentosa que os protexe e alimenta como unha reflexión sobre a sinxela e heroica relación que o mundo tradicional é capaz de establecer co medio que habita e constrúe. O artista capta a resonancia poética desta existencia e conmovenos coa representación do mais humilde, inhóspito ou extravagante; marcas propias da identidade elusiva deste lugar.
“Ás portas de Rinlo” forma parte da iniciativa cidadá “A prol de Rinlo BIC”. O obxectivo é resaltar a singularidade e o valor patrimonial de Rinlo a través da mirada atenta e sensible da arte, reivindicando o valor do vernáculo e a paisaxe histórica do núcleo. O fin que nos alenta é o de promover a causa da súa conservación, concienciando ós cidadáns da importancia de defender e valorar o propio. O catálogo da exposición que publica a Área de Cultura da Deputación de Lugo reúne un total de 50 imaxes que nos acercan e recrean a beleza acumulada no espazo imaxinario da historia e a cultura tradicional que esmorece. Sumar vontades a favor da protección e declaración de Rinlo un Ben de Interese Cultural pode ser o primeiro paso cara a unha actitude máis responsable cos entornos tradicionais en que vivimos, unha oportunidade para comezar a construír un futuro sen perder o sentido e o significado do pasado.
Carlota Eiros, arquitecta
Invitación Refectorio "Ás portas de Rinlo"
OUTRA BARBARIDADE
O asfaltado da lonxa do Parque
Criamos que eran cousas do pasado os atentados ao patrimonio e as barbaridades urbanísticas. Está claro que para o Parque de Rosalía e a súa contorna non corren bos tempos. Tamén criamos que cun alcalde filósofo e unha concelleira de Cultura e Turismo profesora de historia na Universidade, a sensibilidade faríase valer sobre o que ten os picos e as pas pero que carece do coñecemento suficiente para poder discernir entre o que ten mérito do que non o ten, do estético e do antiestético. Pero equivocámonos, porque o ser de letras parece que non garante unha predisposición á sensibilidade, nin ao cultivo do bo gusto, nin ao aprecio polas cousas ben feitas. Estes políticos son o exemplo da paletada, o mal gusto e o despropósito.
Primeiro permitiuse unha urbanización nun lugar que nos vai privar das fermosas vistas que se divisaban desde a pérgola. Precisamente don Ángel López Pérez, a quen se debe o parque, comprou no seu día unha leira para evitar que se construíse nela e entorpecese a que era unha das vistas máis bonitas de Galicia.
Despois demoleuse o pedestal da estatua da España, un exemplo Déco da arquitectura do cemento dos anos 20, no que foron ao vertedoiro catro escudos de cerámica de Manises e causáronse graves danos á escultura fundida en Sargadelos. Fíxose para pór no seu lugar un pastiche fóra de contexto e mal executado.
E agora acábase de cubrir con alcatrán unha lonxa cun pavimento artístico, realizada fai 45 anos con materiais nobres, lastras de granito e canto rodado, deseñada polo arquitecto Efrén García Fernández por encargo do Concello en 1961, e executada en 1964. E isto faise co pretexto de que é custoso mantela. Así que, xeneralizando o argumento, non debería de estrañarnos de que calquera día nos sorprendamos co mesmo tratamento na contorna da Catedral.