-
Inicio
-
Multimedia
- Novas LugoPatrimonio
Últimas Novas (514)
Últimas novas da asociación LugoPatrimonio
A asemblea anual de LugoPatrimonio aprobou as contas do ano e o proxecto de actividades para o 2010
Mostra a súa preocupación polo silencio que mantén a Xunta a respeito de varios proxectos iniciados nos dous últimos anos
Cunha participación importante de asociados e asociadas, a asemblea anual da nosa asociación, despois de dúas horas de traballo, aprobou diversos temas de interese para o futuro non só da propia asociación, senón da nosa cultura e patrimonio. Destacamos, entre eles, os seguintes:
- Agradecido recoñecemento ao traballo realizado pola directiva durante o ano 2009, destacando a xestión económica e a programación das actividades. Asimesmo, cun longo aplauso, agradeceuse o labor da secretaria, Tareixa Cabello, que por diversas razóns persoais deixa esta responsabilidade.
- Preocupación polo silencio que segue a manter a Delegada Territorial da Xunta a respeito de distintos proxectos relacionados coas Terras de Lemos e aprobados no Congreso sobre o Patrimonio Inmaterial, que se lle presentaron ao novo goberno autonómico pouco despois da toma de posesión. Moitos deses proxecto relacionados co futuro turístico, cultural e económico da comarca, que se comezaran a executar anteriormente, están neste momento paralizados. A Asemblea pídelle á Delegada Territorial que non adíe máis a data da entrevista solicitada con ela por parte das distintas asociacións de Lemos que traballan polo noso Patrimonio.
- Preocupación pola persecución que está a sufrir por parte da Xunta de Galicia, o maior patrimonio creado polo pobo galego: o seu idioma.
- Aprobación das actividades presentadas para desenvolver durante o ano 2010: viaxes e actos diversos relacionados cos mesmos, á Coruña, Vigo e Ferrol; Terras e xentes en Rosalía de Castro (viaxe de 2 días polas terras de Padrón); Terras do Bierzo seguindo a novela de Enrique Gil y Carrasco, “El señor de Bembibre”; Xornadas sobre a romanización, con viaxes e percorridos por Lugo, Bande, Valladolid e Palencia; O Courel de Novoneira para completar o coñecemento das terras nativas do poeta: Viaxe tamén seguindo os pasos da biografía de Inés de Castro con visitas a Coimbra, Alcobasa e outros lugares de Portugal; Ciclo do Ferro a desenvolver en diversos meses do ano (marzo, outubro e novembro), con visitas a Riotorto, Cervo, A Pontenova, Samos, Taramundi. Viaxe sorpresa a realizar en agosto.
- Interese cultural e social destacado pola primeira viaxe que a asociación programa para o estranxeiro afastado, Exipto, que se presentou detalladamente no seu desenvolvemento e do que se poden ver condicións e datas noutro apartado desta mesma páxina.
- Cursiño sobre Animación á Lectura co obxecto de perfeccionar o coñecemento oral e escrito do idioma galego.
- Agradecemento aos distintos organismos públicos que nos axudaron a desenvoler a nosa actividade durante os dous últimos anos: Consellaría de Medio Rural, Agader, Sociedade de Xestión do Xacobeo, Consellaría de Industria, Vicepresidencia 1ª da Deputación Provincial, Concellos de Monforte, Chantada, A Pobra do Brollón, Taboada e Quiroga.
- Condolencia pola morte de dous asociados moi queridos: Xesús Vilanova Vázquez e Cándido Rodríguez Caneiro.
Lugo, 12 decembro 2009
Vente connosco a Exipto
Aínda que os datos non son definitivos, si podemos ofrecer unha avanzada nos mesmos.
- Andaremos por Exipto entre os días 12 e 24 de febreiro.
- O prezo, con case todo incluído, achegarase aos 1700 euros.
- O prazo para anotarse está fixado até o 22 de decembro. Se che interesa, sexas ou non asociado ou asociada de LugoPatrimonio, chama ao telefone 676 800 227.
- Deseguido ofrecémosche os lugares que visitaremos:
O CAIRO
- Pirámides de Gizeh e Esfinxe. Visita interior da de Keops.
- Menphis
- Saqqarah
- Espectáculo de luz e son nas Pirámides
- Cidadela. Mesquitas de Ahmed Ibn Tulun, sultán Hassan, El-Azhar, Al-Rifai e mesquita de Alabastro.
- Museo arqueolóxico.
- Museo de Arte Islámico.
- Barrio Copto
- Cidade dos mortos.
- Mercado el Khalili.
CRUCEIRO POLO LAGO NASSER
- Templo de Kalabsha
- Templo de Beit el Wali
- Quiosco de Kertasi
- Templo de Wadi El Sebua
- Templo de Daka el Maharraka
- Templo de Amada. Tumba de Pennut
- Kars Ibrim
- ABU SIMBEL (Templos de Ramsés II e Nefertari. Espectáculo de luz e son)
ASSUÁN
- Presa Alta
- Canteiras de granito e Obelisco inacabado.
- Paseo en falua pola Illa Elefantina. Paseo en camelo até a aldea nubia.
- Illa de Philae. Templo de Isis. Espectáculo de luz e son.
KOM OMBO
- Templo de Sobek e Haroeris.
EDFU
- Templo de Horus.
LUXOR
- Necrópole de Tebas
- Val dos Reis con visita a 5 ou 6 tumbas.
- Val das Raíñas con visita a 1 tumba.
- Templo de Hatshepsut.
- Val dos nobres con visita a 3 tumbas.
- Templo de Medinet Habu.
- Colosos de Menon.
- Templo de Karnak. Espectáculo de luz e son.
- Templo e museo de Luxor.
DENDERA
- Templo de Hathor.
ABYDOS
- Templo de Osiris.
- Templo de Ramsés II.
Actos de LugoPatrimonio para o mes de decembro 2009
Día 2, mércores: conferencia e proxeccións de Delfín Caseiro Nogueiras (escritor), sobre Viaxe de Inverno: Ourense interior, ás 20 h. no salón de actos da Deputación provincial.
Anotacións para a viaxe do día 19, no mesmo lugar, entre 19 e 20 h. Prazas limitadas a 50. Preferencia das asociadas-os sobre os que non o son.
Día 19, sábado: viaxe ao Ourense interior nestes días de inverno, para visitar os seguintes puntos: San Pedro de Rocas (mosteiro e Centro de Interpretación da vida monástica), Xunqueira de Espadañedo (mosteiro e igrexa románica), Montederramo, (mosteiro e igrexa), Santuario dos Milagres (igrexa), Xunqueira de Ambía (igrexa románica de Santa María a Real) e Ourense, onde a última hora da tarde faremos unha visita ao Belén de Arturo Baltar e teremos un encontro con el para falar da súa obra.Deseguido, tendo en conta que se cumpre o 50 aniversario da edición de A Esmorga, de Eduardo Blanco Amor, faremos un percorrido por dous ou tres puntos do roteiro da mesma sinalados nas rúas de Ourense próximas ao Belén.
Día 11, venres: asemblea ordinaria anual para ver como andamos de cartos e que imos facer durante o ano 2010.
Lugo, novembro 2009
Ás portas de Rinlo
Froito dun ano de laboriosidade, o fotógrafo Fernando Páez (Ribadeo, 1953) preséntanos “Ás portas de Rinlo”, a súa persoal visión das xentes e paisaxes deste lugar primixenio e antigo. O gusto do fotógrafo pola representación silenciosa do paso do tempo (“Incursións”, 2005) e o pulso para captar o inenarrable continúan vivos neste novo traballo. O artista retrata os veciños en actitude estoica ás portas das súas casas ou no límite do espazo transitado dos cantís, captando a súa ineludible e dura existencia diaria. As imaxes austeras, melancólicas e naturalistas son tanto unha homenaxe ás persoas e a natureza portentosa que os protexe e alimenta como unha reflexión sobre a sinxela e heroica relación que o mundo tradicional é capaz de establecer co medio que habita e constrúe. O artista capta a resonancia poética desta existencia e conmovenos coa representación do mais humilde, inhóspito ou extravagante; marcas propias da identidade elusiva deste lugar.
“Ás portas de Rinlo” forma parte da iniciativa cidadá “A prol de Rinlo BIC”. O obxectivo é resaltar a singularidade e o valor patrimonial de Rinlo a través da mirada atenta e sensible da arte, reivindicando o valor do vernáculo e a paisaxe histórica do núcleo. O fin que nos alenta é o de promover a causa da súa conservación, concienciando ós cidadáns da importancia de defender e valorar o propio. O catálogo da exposición que publica a Área de Cultura da Deputación de Lugo reúne un total de 50 imaxes que nos acercan e recrean a beleza acumulada no espazo imaxinario da historia e a cultura tradicional que esmorece. Sumar vontades a favor da protección e declaración de Rinlo un Ben de Interese Cultural pode ser o primeiro paso cara a unha actitude máis responsable cos entornos tradicionais en que vivimos, unha oportunidade para comezar a construír un futuro sen perder o sentido e o significado do pasado.
Carlota Eiros, arquitecta
Invitación Refectorio "Ás portas de Rinlo"
OUTRA BARBARIDADE
O asfaltado da lonxa do Parque
Criamos que eran cousas do pasado os atentados ao patrimonio e as barbaridades urbanísticas. Está claro que para o Parque de Rosalía e a súa contorna non corren bos tempos. Tamén criamos que cun alcalde filósofo e unha concelleira de Cultura e Turismo profesora de historia na Universidade, a sensibilidade faríase valer sobre o que ten os picos e as pas pero que carece do coñecemento suficiente para poder discernir entre o que ten mérito do que non o ten, do estético e do antiestético. Pero equivocámonos, porque o ser de letras parece que non garante unha predisposición á sensibilidade, nin ao cultivo do bo gusto, nin ao aprecio polas cousas ben feitas. Estes políticos son o exemplo da paletada, o mal gusto e o despropósito.
Primeiro permitiuse unha urbanización nun lugar que nos vai privar das fermosas vistas que se divisaban desde a pérgola. Precisamente don Ángel López Pérez, a quen se debe o parque, comprou no seu día unha leira para evitar que se construíse nela e entorpecese a que era unha das vistas máis bonitas de Galicia.
Despois demoleuse o pedestal da estatua da España, un exemplo Déco da arquitectura do cemento dos anos 20, no que foron ao vertedoiro catro escudos de cerámica de Manises e causáronse graves danos á escultura fundida en Sargadelos. Fíxose para pór no seu lugar un pastiche fóra de contexto e mal executado.
E agora acábase de cubrir con alcatrán unha lonxa cun pavimento artístico, realizada fai 45 anos con materiais nobres, lastras de granito e canto rodado, deseñada polo arquitecto Efrén García Fernández por encargo do Concello en 1961, e executada en 1964. E isto faise co pretexto de que é custoso mantela. Así que, xeneralizando o argumento, non debería de estrañarnos de que calquera día nos sorprendamos co mesmo tratamento na contorna da Catedral.
ACTIVIDADES DE LugoPatrimonio PARA O MES DE NOVEMBRO 2009
Día 3 de novembro, martes: ás 20 h. no salón de actos da Deputación provincial, exposición e proxeccións dos investigadores Orlando Viveiro Veiga e L. Hixinio Flores Rivas sobre Os Ancares no outono: paisaxe e vida, conferencia previa á viaxe a realizar na xornada do sábado, 7 de novembro.
Antes desta conferencia, entre as 18,30 e as 20 h. quen queira participar na viaxe, poderase anotar no mesmo lugar (salón de actos da Deputación). Para a admisión, as asociadas e asociados terán preferencia sobre os que non o son.
Día 7 de novembro, sábado:
PAISAXE E VIDA: OS ANCARES NO OUTONO. Itinerario
8.00.-Saída de Lugo do lugar habitual (fronte Instituto Lucus Augusti).
9.30.-Parada en Navia para tomar café, ver a ponte medieval e máis a casa torre.
10.30.-Chegada a Coro, lugar da parroquia de Rao, onde veremos a distribución das construcións no espazo do lugar: casa e adxectivas (hórreo, cuartín, palleiro,....). Restos de unha palloza. Capela de Santa Mariña. Andaina deica o Muíño de Morodo que está no río Murias, xusto cando se xunta co Rao. No paseo veremos a paisaxe con espectaculares castiñeiros, avelairas, etc.
12.15.-Parada breve en Santa María de Rao, para ver o Castiñeiro das cruces (fotografiado nos anos trinta do século XX por Walter Ebeling), e tamén unha ollada á igrexa.
13.00.-Saída para Balouta, pasando por Murias, con breve parada despois para ver o val do Rao. Entrada na Gorxa do Rao con espectacular vexetación e cores (dende o marrón até o amarelo dos freixos). Veremos de facer algunha parada breve.
13.30.-Comida en Balouta.
15.00.-Visita breve a Balouta.
15.30.-Saída para o Porto de Ancares e Mirador de Balouta. Explicación dos vales de Candín, Suárbol, e Balouta así como dos picos máis representativos como o Miravales.
16.00.-Baixada para Suárbol e o Piornedo.
16.30.-Visita ao Piornedo. Paseo polo núcleo para observar a súa estrutura e situación das construcións. Visita á Palloza museo do Sesto onde trataremos de facer aportacións á exposición sobre a morfoloxía e funcións da palloza. Tamén teremos contacto con xente da Asociación "O Teixeiro" para ofrecer unha explicación/interpretación musical coa pandeira como protagonista.
18.30/19.00.-Saída para Lugo.
21.00.-Chegada estimada.
Agradecementos de LugoPatrimonio pola fantástica viaxe ás terras de Valdeorras, O Bolo e Viana do Bolo
A Asociación cultural LugoPatrimonio, e no seu nome, o Presidente, D. Lois Diéguez, o día 18 de outubro do 2009, tomou a resolución que deseguido se detalla:
A felicitación a D. Óscar López Mendaña, que durante a mañá do día 18 de outubro desenvolveu, xuntos con outras persoas, unha guía orixinal e atractiva á cidade de Viana do Bolo, conducindo a 47 persoas de Lugo, Vigo, A Coruña e outros lugares de Galiza.
Destacamos a forma orixinal, pois co recibimento cariñoso dun grupo de pandereiteiras que nos ofreceron unha mostra do vestiario, cancións e música de Viana, o paseo polos lugares destacados da cidade, ese detalle sempre agradecido dos bocadiños ou almorzo de media mañá, e a visita tan agradábel e intelixente (teatro sentido de Óscar e Susana, bos actores tamén), á torre medieval e ao seu museo etnográfico (por certo, esplendidamente montado), conseguiron que as 47 viaxeiras e viaxeiros, deixaran a promesa de volver un día con amigos e familiares a coñecer con máis tempo non só a cidade, senón tamén o resto do concello e a comarca.
LugoPatrimonio ten unha longa experiencia viaxeira por moitos países e culturas, e sabe apreciar a calidade dun lugar e a exposición que sobre o mesmo se pode artellar, e o atractivo que na mesma se pode conseguir, de aí esta insistencia en deixarlle patente aos veciños e veciñas de Viana e ás súas autoridades, o potencial e o bo futuro económico que se poden desenvolver, coa experiencia e maxisterio de guías e participantes como arriba deixamos relatado.
LugoPatrimonio, asimesmo, na despedida e agradecementos que fixemos diante do castelo de Viana, deixou a promesa de asistir a esa outra parte que, loxicamente, non puidemos ver, como é o sonado e colorido Entroido de Viana cos personaxes tan atractivos como son os Boteiros, e como non, con esa gastronomía que, do mesmo xeito, valoramos xa na vila de O Bolo.
Exténdanse estas palabras agradecidas ao seu alcalde como representante máis directos do pobo de Viana do Bolo.
Viana do Bolo, a 18 de outubro do 2009-10-25
O Presidente de LugoPatrimonio
Asdo: Lois Diéguez
Celebramos a clausura do Ciclo Viño e Poesía
As terras de Viana, viaxe con proxeccións e música, da autoría de D. Óscar López Mendaña, animador sociocultural.
O Vicepresidente da Deputación D. Antón Bao, patrocinador do ciclo, e o presidente de LugoPatrimonio, D. Lois Diéguez, facendo a clausura oficial deste Ciclo.
Dª Sabela Rodríguez lendo o poema Hino ao Viño, de Florencio M. Delgado Gurriarán.
Conferencia de D.X. M. Fernández Anguiano sobre Aspectos técnicos do viño: a súa relación coa saúde.
Nova agresión no campo de mámoas da Mourela
A Plataforma na Defensa do Patrimonio das Pontes vén de denunciar unha nova agresión no campo de mámoas da Mourela
Logo de se cumpriren máis de dous anos da destrución dos restos do círculo lítico da Mourela, as máquinas que traballan no selado dos taludes da autovía AG-64 veñen de destruir parcialmente un dos túmulos que se atopan emprazados a escasos metros dos noiros da autovía.
En http://www.amigus.org/mourela.php informan diariamente das novidades.
Podes ver tamén as fotos do sucedido no seu DIARIO NECROLÓXICO DO CÍRCULO LÍTICO DA MOURELA.
QUEREMOS GALEGO!
LugoPatrimonio, xunto con milleiros de persoas, colectivos e asociacións, constituiu a Plataforma Queremos Galego para loitar contra a persecución que está a sufrir o noso idioma. Nunca aceptaremos que se hostigue de xeito tan vil o máis grande patrimonio creado polo noso pobo.
QUEREMOS GALEGO é unha plataforma cidadá que nace coa pretensión de unir persoas, colectivos e institucións da máis diversa natureza baixo tres premisas básicas:
1. A lingua galega é patrimonio e ferramenta de comunicación do pobo galego, e as institucións públicas teñen a responsabilidade e obriga de protexela e promocionala.
2. A normalización lingüística ten que ser un proceso progresivo, polo que desde as institucións públicas non se poden tomar medidas que desprotexan ou reduzan a presenza do galego en ningún ámbito.
3. Os acordos asinados por todos só poden ser substituídos por acordos asinados por todos, e o consenso para a lingua galega está no fixado no Plan xeral de normalización da lingua galega aprobado por unanimidade no Parlamento galego en 2004, así como na Carta europea das linguas rexionais ou minoritarias, ratificado por unanimidade polo Congreso en 2001.
http://www.queremosgalego.org/
Máis...
Dúas datas a ter en conta: 13 e 14 de outubro. Clausura do Ciclo Viño e Poesía.
13 de outubro: As terras de Viana, viaxe con proxeccións e música, da autoría de D. Óscar López Mendaña, animador sociocultural.
Será no salón de actos da Deputación provincial de Lugo, ás 20 h.
14 de outubro: clausura do Ciclo Viño e poesía, coa conferencia de D. X. M. Fernández Anguiano sobre Aspectos técnicos do viño: a súa relación coa saúde.
Será no Complexo Xuvenil Lug, ás 20 h. Previamente á conferencia, o Vicepresidente da Deputación D. Antón Bao, patrocinador do ciclo, e o presidente de LugoPatrimonio, D. Lois Diéguez, farán a clausura oficial deste Ciclo. Dª Sabela Rodríguez lerá o poema Hino ao Viño, deFlorencio M. Delgado Gurriarán.
A viaxe que se realizará durante os días 17 e 18 de outubro, polas terras do Barco de Valedoras e da Rúa, terá como inspiración e lectura a obra poética de Florencio M. Delgado Gurriarán, cantor destas fermosas e descoñecidas terras.
La ciudad de Lugo en los siglos XII al XV. Urbanismo y sociedad
PRESENTACIÓN
“La ciudad de Lugo en los siglos XII al XV. Urbanismo y sociedad”
O pasado día 30 de setembro tivo lugar a presentación da obra do historiador lucense e vicepresidente de Lugo Patrimonio, Adolfo de Abel Vilela “La ciudad de Lugo en los siglos XII al XV. Urbanismo y sociedad”, que se enmarca na serie Galicia Histórica do Instituto Padre Sarmiento de Estudios Galegos editada pola Fundación Pedro Barrié de la Maza.
O salón Rexo do Círculo das Artes quedouse cativo para acoller o acto ao que asistiron unhas trescentas persoas. Fixo a presentación do acto Javier López Martínez, director xeral da Fundación Pedro Barrié de la Maza, que dixo do libro que se podía comezar a ler por calquera dos capítulos. Tamén intervíu Eduardo Pardo de Guevara e Valdés, director do Instituto Padre Sarmiento, que fixo a presentación do autor e xustificou que se editase en español a serie Galicia Histórica para que teña difusión fóra de Galicia.
A continuación Adolfo de Abel Vilela fixo un retrato da cidade describindo a decadencia que a vida urbana lucense experimentou na Alta Idade Media. Falou dos tres intentos de repoboación e da reactivación da cidade que culmina no século XII con Raimundo de Borgoña e dona Urraca, da actividade económica, da hospitalidade, da vida monástica e relixiosa, da cultura, o lecer e as loitas feudais, rematando cunhas notas sobre o goberno da cidade.
O libro, que se estructura en vinte capítulos, ten 700 páxinas e 297 fotografías, índices xeral, de persoas e de lugares, así como un amplo apartado de bibliografía. O prezo de venda é de 25 €.
Pregón das Festas de San Froilán 2009
Lois Diéguez, o noso presidente, fixo este ano de pregoeiro das Festas de San Froilán. Foi un pregón distinto, pois rompeu o estilo habitual que se ven repetindo cada ano. Cheo de humor, fantasía e realidade, foi, é, como o seu autor o define, un CONTO MÁXICO, que de seguido che ofrecemos.
Foto de La Voz de Galicia (ÓSCAR CELA)
CONCLUSIÓNS DO CONGRESO SOBRE PATRIMONIO INMATERIAL DAS TERRAS DE LEMOS – Xornadas de Primavera e Outono
CONCLUSIÓNS DO CONGRESO SOBRE PATRIMONIO INMATERIAL DAS TERRAS DE LEMOS – Xornadas de Primavera e Outono
Alternativas para a consolidación do Entroido Ribeirao e mais o de Salcedo, danzas da Cervela e A Ermida, e Fachas e Agucios de Castelo e Vilelos
- Campo de traballo e obxectivos
O traballo para manter o Patrimonio Inmaterial das Terras de Lemos vén de séculos atrás. Este traballo está representado nestes momentos polas Asociacións seguintes:
Asociación cultural As Fachas de Castelo (Taboada), Asociación xuvenil e cultural “Os Turulecas”, de A Cervela (O Incio), Asociación de Veciños de Salcedo (A Pobra de Brollón), Asociación Amigos do Entroido Ribeirao (Santiago de Arriba-Chantada), Asociación Os agucios (Vilelos-O Saviñao), Asociación cultural Souto do Val, da Ermida (Quiroga).
Desde hai dous anos, a Asociación LugoPatrimonio, comezou a traballar tamén coas anteriormente citadas cos obxectivos de facer unión entre todas para elaborar conxuntamente programas e alternativas concretas dirixidas ás entidades públicas e privadas, de cara a conseguir a consolidación e desenvolvemento deste Patrimonio Inmaterial. Traballou, tamén para unir as distintas administracións neste Programa concreto, de xeito que a súa actuación ao respecto estea coordinada tamén, para o aforro económico e o mellor cumprimento dos obxectivos.
Para isto, valeuse do seguinte programa inicial:
- Declaración destes ritos festivos como festas de interese turístico e novas figuras que xirarían arredor da idea de protección como Ben Rural de Interese Cultural e Etnográfico (BRICE).
- Catalogación de todos os elementos patrimoniais que existen en cada zona.
- Contratación de persoal cualificado para estudar e investigar todo o relacionado con estas festas, nos seus aspectos histórico, etnográfico, etc.
- Creación dunha Escola Permanente de Formación que aproveite as persoas que neste momento manteñen a tradición e a sabedoría destas festas, para así asegurar o seu futuro. Formación para a xente nova das parroquias, nenos e nenas en xeral e incidencia a través da Escola nos centros de ensino e dentro dunha actividade cultural ben planificada. Isto levaría a fixar postos de traballo a partir da xente coa que se conta en cada lugar, vella e nova.
- Creación de talleres de artesanía a partir do vestiario e material usado polas persoas que activan as festas, como campaíñas e chocas, cintos, camisas, pantalóns e blusas, panos, sombreiros, fitas (colonias), peles, carautas, máscaras... o que nos levaría a potenciar traballos de ferreiros-as, costureiras-os, tecedores-as, carpinteiros-as, etc., sen esquecer tampouco outros produtos artesáns relacionados tamén con articulos para agasallo ou a gastronomía propia.
- Rehabilitación do patrimonio material da zona de influencia de cada punto onde se dá a festa, con planificación de fases de actuación no caso de ser moi custoso.
- Atención ás infraestruturas necesarias para unha mellor comunicación vial e a unha boa presenza dos lugares e aldeas.
- Sinalización coidadosa nas estradas para chegar sen problema aos lugares da festa.
- Potenciación e coidado de rutas a crear arredor da propia festa (Ruta do Entroido, Ruta do Oso, Ruta da Danza, Ruta dos Castros... ou aquelas que sexan de interese polas características paisaxística e patrimoniais propias de cada punto).
- Creación e desenvolvemento do Itinerario da Festa e do Rito que uniría os seis puntos indicados, con chamadas propagandísticas para visitalos nas distintas estacións do ano: Primavera (Entroidos), Outono-Verán (Danzas e Fachas). Curiosamente, o tempo festivo e ritual está relacionado, sobre todo, co solsticio de inverno, aínda que a súa celebración sexa noutra época debido a cambios de datas relativamente recentes. Este Itinerario distinguiríase por un logo chamativo.
- Confección de Programas culturais e turísticos espallados por todas as casas de turismo rural, hoteis, restaurantes, agrupacións culturais, etc., co obxecto de darlle ao e á visitante alternativas para poder pasar uns días de lecer pola zona. Isto levaría a edición de folletos, dvd, libros e música e un estudo máis detallado dos ritos, sempre baixo a denominación do Itinerario da Festa e do Rito, e co coidado de respectar o sentido cultural profundo e non a folclorización no seu sentido negativo.
- Recollida da música producida nos diversos ritos festivos para o seu estudo, edición e acompañamento de calquera actividade realizada a respecto dos mesmos.
- Estudo e presenza do contexto paisaxístico como contorna física e determinante para a creación do rito.
Trátase, xa que logo, de levar adiante no prazo de 5 anos,
os puntos indicados
2. Puntos conseguidos ou en trámite de consecución
Dos diversos encontros mantidos coas consellarías chamadas naquela altura de Medio Rural, Cultura e Deportes, Innovación e Industria, Vivenda e Solo, Igualdade e Benestar Social, e coa Vicepresidencia da Deputación provincial e algúns dos concellos do ámbito xeográfico das Asociacións, como o de Chantada, Taboada ou A Pobra do Brollón, temos conseguido:
-
- Declaración de Festa de Interese Turístico para as Fachas de Castelo.
- Dúas becas por parte da Deputación Provincial de Lugo para o estudo e investigación das festas. Neste momento estase realizando ese traballo.
- Atención e axudas económicas para o desenvolvemento das actividades anuais e a potenciación das celebracións.
- Proxectos para a rehabilitación ou construción de locais sociais e centros de interpretación nos casos de Castelo e Santiago de Arriba.
- Proxectos a piques de se licitar para rehabilitación do cabido, angarellas e pinturas da igrexa románica da Cervela así como das imaxes, fonte e capela de San Roque.
- Estudos e proxectos orzamentados para a intervención nos espazos públicos dos núcleos de Salcedo, Santiago de Arriba e A Cervela por parte das Consellarías de Vivenda e Medio Rural.
- Creación de Unidades Didácticas para introducir nos centros de ensino.
- Obradoiros, conferencias e exposicións en Chantada sobre o Entroido Ribeirao co obxectivo de poñer en relación as distintas xeracións.
- Axudas para a rehabilitación de vivendas en toda a zona.
3. NECESIDADES PONTUAIS DE CADA UNHA DAS FESTA E ACTIVIDADES
Entroido Ribeirao: Santiago de Arriba
- Construción do Centro de Interpretación do Entroido Ribeirao que contemple almacén, sala para exposicións e centro de interpretación, con usos, no seu caso, para reunións, proxeccións e actos culturais, taller para a confección de sombreiros, fitas e carautas.
- Acondicionamento do campo da Festa, onde se celebran os oficios do Entroido.
- Atención ás fachadas das casas de Santiago de Arriba.
- Alternativas ao problema das campaíñas que levan os Volantes, chocas, camisas de pano sedán, panos...
- Actividades permanentes.
- Persoal para a atención a este Programa.
Entroido de Salcedo
- Arranxo da Estrada Pobra do Brollón-Salcedo.
- Asfaltado da pista de Salcedo a Paramedela.
- Melloras no alumeado público de Salcedo.
- Acondicionamento do campo da festa.
- Rehabilitación da zona das Pendellas e A Carreira.
- Rehabilitación do Altar Maior da Igrexa.
- Ampliación do local social multiusos.
- Alternativas para a recuperación da aldea de Parada dos Montes co obxectivo de convertela nun grande Centro de Interpretación en vivo da nosa cultura tradicional rural.
- Actividades permanentes.
- Persoal para a atención a este Programa.
Danzas da Cervela.
- Alternativas para a confección do vestiario (panos, pantalóns, camisas, sombreiros, arcos...), de xeito que sirvan para a provisión propia e mais para a creación dun taller de artesanía.
- Arranxo e mellor distribución do Centro social (salas para exposicións, reunións, proxeccións e actos; centro de interpretación, almacén...).
- Rehabilitación do cabido, angarellas e pinturas da igrexa románica, así como recuperación dos santos barrocos (Cristo e San Roque).
- Amaño da praciña da igrexa e o cruceiro.
- Rehabilitación da capela de san Roque e limpeza e amaño da Fonte do mesmo santo.
- Rehabilitación do lugar da Cervela.
- Actividades anuais.
Fachas de Castelo
- Rehabilitación da Escola de Castelo para Centro de Interpretación das Fachas e local polivalente.
- Apoio aos diversos actos anuais que se relacionan coa Festa, de xeito que se apreze nos mesmos o ter a consideración de Festa de Interese Turístico.
- Creación e desenvolvemento dun Centro de Artesanía relacionado cos obxectos que se producen arredor da festa e dos produtos da comarca.
Agucios de Vilelos
- Arranxo do camiño que leva ao castro da Besta (Vilelos) onde se fan os festexos (2 qm. aproximadamente). O proxecto gardará unha estética e calidade acorde coa contorna paisaxística.
- Restauración do Peto de Ánimas da Besta (Vilelos).
- Construción ou rehabilitación dun edificio próximo ao castro da Besta, que sirva como Centro de Interpretación do mundo que xira arredor dos Agucios e como local polivalente (centro cultural, centro de artesanía, local social, etc.).
Meco e Pampórnigas da Ermida
- Restauración das máscaras do Meco e as Pampórnigas, pois o tempo e o uso tenas estragado de forma preocupante.
- Copia do orixinal do Crismón para que os visitantes a poidan contemplar no mesmo lugar onde se encontrou ou, no seu caso, no Centro de Interpretación que se cree con este motivo.
- Urbanización axeitada do campo da festa (árbores, alumeado, papeleiras, aparcadoiro...) pois vai ser tamén un espazo fundamental para os propios visitantes, podendo aproveitarse como recepción dos mesmos.
- Rehabilitación das Fontes de San Vitoiro e Cantelo.
- Construción dun Centro de Interpretación no Castro da Ermida, no que se recollerá todo o relacionado coa Historia e desenvolvemento deste espazo singular e dos personaxes do Meco e as Pampórnigas.
- Proxecto para Rehabilitación do propio Castro da Ermida e de todas as construcións que forman parte do mesmo.
- Actividades anuais.
O Congreso sobre PATRIMONIO INMATERIAL DAS TERRAS DE LEMOS proclama, xa que logo, a necesidade de que as distintas institucións das que se vén falando, apoien o Programa e puntos sinalados, coa fin de que estean executados nun tempo non superior a cinco anos.
Asi mesmo, pide que os Proxectos que a Xunta do bipartito tiña xa aprobados, sexan executados sen demora polo goberno actual.
Quiroga, a 8 de setembro do 2009