Visitas ao Mueso e Castro de Viladonga e a Sal Porta Miñá
22 de marzo
Nun día de auga fixemos pola mañá a viaxe ao Museo e Castro de Viladonga dentro do ciclo dedicado ao mundo romano. Despois de ver un vídeo explicativo o presidente da Asociación Adolfo de Abel Vilela fixo uns comentarios relacionados coa historia evolución do xacemento e das instalacións. O interese polo castro comeza en 1911 ao aparecer un torques de ouro, comezando as escavacións na década dos anos 70 baixo a dirección de Manuel Chamoso Lamas, contando coa presenza do arqueólogo Felipe Senén López, descubríndose un gran número de estruturas pertencentes a casas e abundante material de entre os séculos II a V d.C., pertencente á cultura galaico-romana. Desde o ano 1982 os traballos arqueolóxicos fixéronse baixo a dirección de Felipe Arias Vilas.
En 1983 o Ministerio de Cultura creou o Museo, nun edificio que fora construído para almacén nos anos setenta. A partir de 1990 a súa xestión foi transferida á Xunta de Galicia. Entre 1992 e 1994, baixo a dirección de Felipe Arias, fixéronse importantes obras de reforma e ampliación coa construción dun novo edificio a continuación do xa existente.
Despois de visitar as diversas salas do Museo, que se caracteriza por unha montaxe museográfica moi didáctica, e polo mesmo doado de comprender, pasamos ao castro circunvalado pola parte inferior debido á choiva.
Tras xantar en Meira, regresamos a Lugo visitando a Sala Porta Miñá para ver a exposición permanente sobre o Lugo romano, desde a fundación ata a chegada do cristianismo, e un tramo da cloaca recentemente aberto ao público moi ben musealizado.
