-
Inicio
-
Multimedia
- Novas LugoPatrimonio
Últimas Novas (520)
Últimas novas da asociación LugoPatrimonio
TRINTA ANOS DE ESCAVACIÓNS ARQUEOLÓXICAS NA CIDADE DE LUGO
O 15 de xuño e por iniciativa de Lugo Patrimonio, no salón de actos da Deputación recordáronse os inicios, facía 30 anos, coincidindo coa construción dos aparcadoiros subterráneos, das escavacións arqueolóxicas na capital lucense, previas ás intervencións no casco histórico e a súa zona de influencia. O presidente da asociación Adolfo de Abel Vilela, no inicio das escavacións exercía como delegado provincial de Cultura. Interviñeron o exalcalde Vicente Quiroga, a arqueóloga municipal Covadonga Carreño e o xornalista Ernesto Sánchez Pombo; moderou Branca Rodríguez Pazos, vicepresidenta da asociación.
Abel Vilela fixo unha exposición da situación precaria en que estaba a delegación provincial da Consellería de Cultura, sen arqueólogo e sen lexislación autonómica, estando recentemente aprobada a lei de Patrimonio estatal, sen desenvolver, que era a que se trataba de aplicar. Explicou que se dictáronse unhas normas de acordo co Concello que obrigaba a facer escavacións en área, catas e prospeccións, segundo os casos. Relatei como un coñecido avogado lucense, que quería construír unha casa na rúa de San Froilán, insultoume no meu despacho porque tiña que facer catas no lugar onde se tiñan que ir as zapatas.
Ao ver que aparecían restos arqueolóxicos, o entón alcalde, Quiroga, chamou a un arqueólogo de Milán, Mario Mirabella Roberti, que certificou que os achados tiñan importancia. Arqueólogos da Universidade de Santiago fixeron catas durante sete meses na Praza da Constitución. Pero como pasaba o tempo e a empresa Dragados y Construcciones tiña que comezar as obras, o concelleiro de Tráfico, Alfredo Mosteirín Castañer, deu orde a unha escavadora que comezase o seu traballo, sendo arrasado un mosaico o que provocou que os arqueólogos en sinal de protesta se negasen a realizar as escavacións.
Carreño pola súa banda, explicou que nunha reunión celebrada en Santiago, Mosteirín pediu aos arqueólogos galegos que se fixesen cargo das escavacións e, como non quixeron, ofreceuse Antonio Rodríguez Colmenero, naquel momento profesor na Universidade de Oviedo que escavaba no campamento militar de Bande (Ourense).
CONFERENCIA SOBRE A PROBLEMÁTICA DA DELIMITACIÓN DO CAMIÑO PRIMITIVO
O día 9 de xuño, tivo lugar a segunda conferencia do ciclo, titulada "O Camiño Primitivo e a problemática da súa delimitación"; que estivo a cargo de Ricardo Gómez Polín, que correu co peso da conferencia como gran coñecedor e valedor do Camiño. e Antonio Ventura Figueroa, experto en Sistemas de Información Xeográfica, que se dedicou a comentar os cambios sobre fotografías aéreas, algunha tamén cos perfiles para darse conta das dificultades do novo trazado.
Ao longo de dúas horas, Polín fixo unha introducción sobre o valor histórico, paisaxístico, arquitectónico e relixioso, para despois ir comentando os cambios introducidos pola administración autonómica, desde o concello de A Fonsagrada ata Melide, que non tivo en conta, en moitos casos, a pegada histórica, levando por sitios polos que nunca pasou, servindo a intereses de particulares, ou fuxindo dos problemas da apropiación do camiño por particulares.
CONCERTO DA QUENLLA
O día 19 de maio, ás 20,30 horas no salón de actos da Deputación Provincial, tivo lugar a actuación do grupo musical A Quenlla que interpretou poemas musicados do poeta Manuel María. O salón completou o aforo sendo moitas as persoas que non puideron entrar. Abriu o acto Adolfo de Abel Vilela, presidente de Lugo Patrimonio, que agradeceu a presenza do grupo musical e de Alfonso Blanco Torrado, que o presentou. O concerto durou hora e media e cada unha das composicións foi comentada con anécdotas e outros detalles polos membros do grupo Mini e Mero. Con esta actuación a Asociación deu por rematado o ciclo "Manuel María: Amar a vida".
VIAXE A RUMANÍA
O 3 de maio, con motivo da viaxe a Rumanía que varios socios da Asociación farán do 27 de maio ao 5 de xuño acompañados por Lois Diéguez, o escritor e poeta deu unha charla titulada "Diario de viaxe: polas terras de Rumanía", como limiar á visita a este país para el xa coñecido, facendo proxeccións e comentarios dos lugares a visitar: Bucarest, Sinaia, Bran, Brasov, Prejmer. Rasnouv, Brasov, Medias, Biertan, Sighisoara, Bicaz, Piatra Neamt, Targu Neamt, Humor, Varonet. Marxinea, Sucevita, Moldovita, Sadova, Bogd
SEGUINDO OS PASOS DE SAN FROILÁN
Os días 30 de abril e 1 de maio, a Asociación viaxou as provincias de Zamora e León facendo de guía Ignacio Rodríguez Eguibar. Na mañá do primeiro día visitouse o que queda do Mosteiro de San Miguel de Moreruela de onde viñeron para Lugo as reliquias de San Froilán, que pertenceu ao Cister, sendo a parte que se conserva máis importante a cabeceira da igrexa, con sete capelas absidais e deambulatorio, de estilo de transición entre o románico e o gótico.
CONFERENCIA DE ADOLFO DE ABEL
O 14 de abril, no salón de actos da Deputación Provincial, o historiador e presidente de LugoPatrimonio, Adolfo de Abel Vilela, deu a primeira charla do ciclo "Seguindo os pasos de san Froilán", co título "O culto a san Froilán en Lugo". Na disertación foi comentando as orixes do culto na cidade, que se remonta ao último terzo do século XV coa construción dunha capela na catedral, en 1605 decláraselle patrón de Lugo e en 1610 fundouse unha confraría para darlle un culto máis solemne, organizándose as primeiras festas profanas, que se celebraron intermitentemente no século XVII, chegando a desaparecer, recuperándose no último cuarto do século XIX.
A súa imaxe estivo no antigo retablo das Casas Consistoriais, hoxe na parroquia de Santa María de Villafiz, e na catedral está representado na capela nova de fins do século XVIII, no coro de Francisco de Moure, na capela do Pilar, e na fachada principal.
En 1894 fundouse unha parroquia coa súa advocación, e dedicóuselle a rúa que antes se chamaba do Sol e o novo cemiterio.
CICLO MANUEL MARÍA. Viaxe sentimental por Outeiro de Rei e a Terra Cha
O sábado, día 2 de abril, dentro do ciclo "Manuel María: Amar a Vida", a Asociación fixo unha viaxe guiada por Lois Diéguez servíndose dunha selección que fixo de trinta poemas relacionados cos lugares máis íntimos do poeta. Os participantes comezaron a visita pola casa natal de Hortas, e recitaron os poemas que se entregaran previamente nunha edición impresa titulada "Viaxe sentimental por Outeiro de Rei e a Terra Cha", na Praza do Concello, cemiterio con ofrenda floral, campo de Santa Isabel, igrexa de Baamonde, San Alberte rematando en Penas de Rodas.
Conferencia de Camilo Gómez Torres: "Manuel María: Obra poética"
O xoves, día 31 de marzo, ás 20 horas, o profesor doutor Camilo Gómez Torres, autor de Manuel María: poesía, traballo lingüístico e traballo cultural, e Manuel María: os traballos e os días, así como varios artigos sobre a obra do poeta chairego, deu a conferencia "Manuel María: Obra poética", na que fixo unha análise das etapas evolutivas do autor de mil setecentos poemas publicados en máis dun cento de libros.
Máis...
XANTAR DE LUGOPATRIMONIO A LOIS DIÉGUEZ
A Asociación Lugopatrimonio ofreceu onte un xantar de agradecemento ao escritor e poeta Lois Diéguez, cofundador e presidente da entidade cultural nos últimos dez anos. Un centenar de socios mostráronlle coa súa asistencia o seu recoñecemento ao traballo desenvolvido.
O actual presidente Adolfo de Abel Vilela pronunciou unhas palabras no nome dos asociados nas que recoñeceu a humanidade e a xenerosa entrega de Lois Diéguez a Asociación, no seu interese por divulgar a cultura do país e o seu patrimonio.
Como recordo do acto a vicepresidenta Branca Rodríguez Pazos entregoulle unha placa orixinal do ceramista Francisco Pérez Porto.
Pola súa parte Lois Diéguez agradeceu aos asistentes ao acto de irmandade, a colaboración prestada polas xuntas directivas, manifestando a súa satisfacción por ter vivido multitude de experiencias compartidas cos membros da Asociación. O escritor agasallou aos asistentes cun texto seu titulado "A nube azul. Conto con procura para os grandes viaxeiros e viaxeiras de LugoPatrimonio".
Mesa redonda "Manuel María, poeta do noso pobo"
O día 3, xoves, ás 20 horas no Salón de actos da Deputación Provincial celebrouse a segunda actividade do Ciclo "Manuel María, amar a vida" que a Asociación dedica ao poeta chairego con motivo de ser o persoeiro ao que está dedicado o Día das Letras Galegas do ano 2016.
Interviron Bautista Álvarez, Pilar García Negro e Francisco Rodríguez, actuando como moderador Manuel López Foxo, todos eles vinculados co poeta por amizade e ideoloxía. Fixeron unha análise da obra do autor, recitando poemas seleccionados, e deron unha visión da súa actitude e compromiso persoal desde a experiencia de cada un.