20 de abril
Esta viaxe tivo por finalidade visitar, en dous grupos, o Pazo de Fefiñáns, acompañados de dúas guías do establecemento e a Fundación Manolo Paz. Na entrada do pazo, na ampla praza que no seu día pertenceu a este conxunto, onde está a igrexa de san Bieito, fíxose unha introdución histórica e artística do edificio construído en varias fases, no estilo renacentista, do que foi fundador Juan Sarmiento Valladares, conselleiro de Felipe II, hoxe de propiedade dos marqueses de Figueroa.
Xa no interior percorremos todas as estancias, bastante escasas de mobiliario e artes decorativas que son propias deste tipo de palacios, chamando a atención especialmente as esculturas de Mariano Benlliure e Francisco Asorey, así como as dun descendente que foi discípulo do escultor galego, e a sala decorada con papel coloreado francés do século XIX, con motivos otomanos. Na planta alta da torre da homenaxe, onde está a biblioteca, detivéronse diante dunha reprodución da carta xeométrica de Galicia de Domingo Fontán.
Despois saímos ás hortas e viñedos pola ponte balaustrada, utilizada polos propietarios para non ter que pisar a vía pública, rematando cunha degustación do albariño das adegas do pazo.
Despois de xantar trasladámonos a Quintáns en Castrelo (Cambados) para visitar a Fundación do escultor Manolo Paz e o seu taller, onde nos recibiu e nos acompañou pola extensa finca onde se expoñen as súas esculturas de gran porte, moi ben integradas na paisaxe onde o Umia desemboca no Atlántico.
Por favor, asegúrese de ter introducida a información marcada con (*). O código HTML non está permitido.