INICIO
As graves feridas da Muralla
Nun tempo en que parece que se mide ao milímetro todo aquilo que pode estragar, mesmo esteticamente, a Muralla, estánselle a espetar, non obstante, sen escrúpulo algún, coiteladas graves das que poñemos estes exemplos:
- A 5 ou 8 m. do seu adarve construíronse nos últimos meses novos faios ou pisos baixo cuberta, elevando escandalosamente a pendente dos lousados. Sirvan como exemplo as dúas fotos seguintes:
1. Fronte á Porta de San Pedro, a uns 8 m.
2. Campo Castelo. A uns 5 m. do adarve da Muralla.
- Constrúense á beira da Muralla, alturas que, ademais, agachan por completo unha boa panorámica da Catedral da que aínda hai uns días gozabamos. É un edificio do Vicerreitorado para sala de exposicións. Ao lado hai dúas casas que se están esboroando e que, restauradas, podían facer estas funcións culturais.
3. Isto que será novo edificio ofende a Muralla e tapa a Catedral.
- Nos dous últimos anos dá a sensación que hai unha carreira para tapar os horizontes libres da Muralla:
4. Obsérvense os tres edificios do fondo que compiten coas torres da Catedral
5...ou este edificio que anulou o respiro dos horizontes verdes que se vían desde a Porta do Hospital.
- Taparase tamén, co novo PXOM, toda esta zona verde do Carme, a única xa que nos comunica en camiños históricos co río Miño, e que é un auténtico Parque Arqueolóxico?
CONCLUSIÓNS
Que din o goberno do Concello, ou a Consellaría de Cultura?
Segue existindo Icomos?
Lugo, 16 de novembro do 2007
O Presidente
Lois Diéguez
